Met Caerdydd yw’r brifysgol gyntaf i ennill statws Partner Datblygu Pobl CIPD

Prifysgol Metropolitan Caerdydd yw’r brifysgol gyntaf i ennill statws Partner Datblygu Pobl (PDP) CIPD.

​Mae’r CIPD yn cydnabod sefydliadau sydd wedi ymrwymo i ddatblygu eu pobl broffesiynol trwy gysoni eu gallu a’u heffaith â meini prawf CIPD, gan gynnwys hyrwyddo a buddsoddi mewn proffesiynoliaeth, darparu pwyntiau mynediad i’r proffesiwn pobl, a chydweithio â CIPD i amddiffyn a chynorthwyo’r proffesiwn pobl. Llai nag 20 sefydliad ar draws y DU sydd wedi ennill statws Partner Datblygu Pobl hyd yn hyn.

Cyflawnodd Met Caerdydd statws PDP trwy ddangos ei ymrwymiad i ddarparu swyddogaeth pobl o safon ryngwladol a meithrin diwylliant o ddatblygu’n barhaus trwy gysoni cynnydd â map CIPD o’r proffesiwn, sy’n gweithredu fel meincnod rhyngwladol ar gyfer y proffesiwn pobl a llwyddiant sefydliadau.

Yn ogystal â’r ffaith taw Met Caerdydd yw’r brifysgol gyntaf i gyflawni’r statws yma, mae’n un o gwta dau sefydliad yng Nghymru i ennill yr achrediad, ynghyd â Chastell-nedd Port Talbot.

Mae’r Brifysgol yn cyflogi 1,600 o bobl, y mae 35 ohonynt yn gweithio yn y tîm gwasanaethau pobl. Roedd y sefydliad yn awyddus i ennill statws PDP er mwyn sicrhau y gallai ddarparu’r swyddogaeth AD a phobl y mae’r holl weithwyr yn ei haeddu, er mwyn caniatáu i’w weithwyr wireddu eu potensial, ac er mwyn helpu i gynnal statws y Brifysgol fel un o ddarparwyr addysg gorau Cymru.

Mae Ashley Flaherty, Cyfarwyddwr Gwasanaethau Pobl Met Caerdydd yn llawn balchder am gamp y tîm. Dywedodd: “Rydyn ni’n falch iawn taw ni yw’r brifysgol gyntaf yn y DU i ennill statws Partner Datblygu Pobl CIPD.

“Dros y tair blynedd diwethaf, rydyn ni wedi edrych yn ofalus ar sut y gallwn drawsnewid ein dulliau o weithio a sut y gallwn ni gyflawni ein strategaeth pobl mewn ffordd effeithiol. Mae alinio ein cynllun datblygu â map Proffesiynau CIPD, buddsoddi yn ein datblygiad ni ein hunain, a meincnodi yn erbyn safonau’r diwydiant, wedi caniatáu i ni gyflawni hyn.

“Mae meithrin ein proffesiynoliaeth a’n hyfedredd wedi ein galluogi ni i ddatblygu swyddogaeth gwasanaethau pobl ragorol ac wedi helpu i greu lle bendigedig i weithio.”

Mae ennill statws PDP yn golygu bod Met Caerdydd bellach yn arbenigydd cydnabyddedig mewn datblygiad sefydliadol, sy’n cynnal ei hygrededd nid yn unig yn fewnol ac o fewn y byd academaidd, ond hefyd gyda rhanddeiliaid allanol. O ran ei gyflogeion, mae’n golygu bod y brifysgol wedi ymrwymo i’w datblygiad proffesiynol ac y bydd yn parhau i flaenoriaethu eu llesiant a’u datblygiad personol nhw.

Dywedodd Lesley Richards, Pennaeth CIPD Cymru: “Mae hi’n gamp aruthrol i Brifysgol Metropolitan Caerdydd taw hi yw’r brifysgol gyntaf yn y DU i ennill y fath gydnabyddiaeth a dylent fod yn falch iawn o’u llwyddiant. Mae’r teitl yma wir yn dangos eu hymdrechion i greu diwylliant sy’n rhoi pobl yn gyntaf er mwyn sicrhau bod eu gweithwyr yn parhau i ddarparu gwaith o safon ar gyfer y bobl y maent yn eu gwasanaethu.”