Arweinydd addysg, Dr Nishat Riaz MBE, yn cael Doethuriaeth er Anrhydedd

​​​Cafodd yr arweinydd addysg, Dr Nishat Riaz (MBE), Ddoethuriaeth er Anrhydedd gan Brifysgol Metropolitan Caerdydd heddiw (dydd Iau 27 Gorffennaf).

​Mae gan Nishat dros 25 mlynedd o brofiad ym maes arweinyddiaeth addysg ac yn 2017 cafodd MBE am ei chyfraniad ym maes addysg. Mae hi wedi datblygu, rheoli a goruchwylio rhaglenni ar raddfa fawr ar iechyd, rhywedd, sgiliau, diwylliant ac addysg.

Yn ystod ei haraith yn Seremonïau Graddio Met Caerdydd yng Nghanolfan Mileniwm Cymru, dywedodd Nishat: “Heddiw, mae’n fraint ac yn anrhydedd mawr i mi gael cysylltiad nodedig â’r sefydliad ysbrydoledig hwn. Gan fy mod yn dod o gymuned wledig, ynysig a bod y ferch gyntaf yn nheulu fy mam yn ogystal â theulu fy nhad i fynd i brifysgol, gan edrych yn ôl, ni allwn hyd yn oed ddychmygu bod yma, heb sôn am gael fy nghofrestru yn y sefydliad hwn fel myfyriwr ffurfiol. Mae’r Brifysgol yn estyn allan ataf yn fraint brin ac unigryw, anrhydedd y byddaf bob amser yn ei thrysori a’i pharchu.

“Rydw i’n cyflwyno’r wobr hon i’r bobl wych rydw i’n gweithio gyda nhw yn y Cyngor Prydeinig a’r miliynau o unigolion anhygoel rydyn ni’n gweithio iddyn nhw i helpu i greu byd heddychlon a llewyrchus.”

Nishat yw Pennaeth Byd-eang Systemau Addysg Uwch a Rhyngwladoli ar gyfer y Cyngor Prydeinig. Cyn y rôl hon, bu’n rheoli gwaith addysg y Cyngor Prydeinig ym Mhacistan, un o’r rhaglenni addysg mwyaf yng nghenadaethau’r DU ledled y byd.

Rhoddodd Nishat gyngor i fyfyrwyr oedd yn graddio heddiw: “Er ein bod yn dathlu eich ymdrech, eich gwytnwch a’ch ymrwymiad sy’n arwain at eich cyflawniadau ar y diwrnod graddio hwn, rhaid i ni gofio ein bod yn byw mewn byd sy’n sylfaenol anghyfartal, un nad yw’n gyfyngedig i ni’n unig. Yn anffodus, er gwaethaf yr holl ddatblygiadau gwyddonol a thechnolegol, nid yw’r byd yn wirioneddol deg, cynhwysol a chyfartal eto. Mae o leiaf dair miliwn o blant yn colli eu bywydau bob blwyddyn oherwydd diffyg maeth, gyda bron i 260 miliwn yn cael eu hamddifadu o addysg, heb unrhyw fai arnynt hwy eu hunain.

“Credaf na allwn ac na ddylem aros i rywun arall bontio’r bwlch rhwng y rhai sy’n freintiedig a’r rhai sydd heb ddim. A dyna pam, heddiw, yn y digwyddiad mawreddog hwn, ar yr achlysur hynod hwn, rwy’n gofyn i mi fy hun ac i bob un ohonoch feddwl am y newid cadarnhaol y gallem ei wneud o’n cwmpas. Gadewch i ni feddwl y tu hwnt i ni ein hunain a dod yn ffynhonnell cyfle i o leiaf un person o fewn ein cyrraedd. Coeliwch fi, mae gennych chi’r grym a’r angerdd i wneud hyn. Wrth i chi fynd allan o’r drws hwn, gallwch ddatgloi ac ysgogi’r pŵer hwnnw ac agor ffenestr fach o gyfleoedd i’r rheini sydd mewn angen ac yn llai breintiedig.”

Roedd angerdd ac ymrwymiad Nishat ynghylch datblygu systemau addysg hygyrch, cynhwysol a theg wedi helpu i ddatblygu diwygiadau addysg ar raddfa fawr gan gyrraedd miliynau o ddysgwyr ym Mhacistan.

Dywedodd Dr Fiaz Hussain, Deon Cyswllt Partneriaethau ym Mhrifysgol Metropolitan Caerdydd: “Mae brwdfrydedd Nishat i helpu, arwain a thywys unigolion a sefydliadau i wireddu eu dyheadau yn ddiguro. Mae Nishat wedi chwarae rhan allweddol yn y gwaith o greu partneriaethau sefydliadol cryf rhwng y DU a Phacistan, yn ogystal ag ymdrin â meysydd ysgolion, sgiliau, addysg uwch, ysgoloriaethau, yn amrywio o fodelau addysgol traddodiadol i raglenni cyfunol arloesol.

“Mae profiad Nishat hefyd wedi cyfrannu’n uniongyrchol at lwyddiant y prosiect B-International, y mae Prifysgol Metropolitan Caerdydd yn ei arwain. Mae’r prosiect wedi sefydlu Canolfannau Rhyngwladoli mewn pedair Prifysgol orau ym Mhacistan ac mae wedi darparu llwyfan i rannu ac archwilio arferion da rhwng partneriaid yn Ewrop a Phacistan. Mae gwobr heddiw yn dyst i waith Nishat a bydd yn cadarnhau ymhellach y berthynas ragorol sydd gan Brifysgol Metropolitan Caerdydd â’r Cyngor Prydeinig ym Mhacistan.”

Nishat oedd y peiriannydd benywaidd cyntaf o Dalaith Gilgit Baltistan i raddio gyda gradd mewn Peirianneg Electroneg. Mae ganddi hefyd MA mewn Datblygu Rhyngwladol o Brifysgol Manceinion a Phd mewn Gwyddorau Rheoli o Brifysgol Bahria, Pacistan.

Mae gwaith Nishat ym maes addysg wedi mynd â hi o amgylch y byd, gan siarad, ysgrifennu, cadeirio ac eiriol o blaid mynediad at addysg a llwyddiant addysg.

Yn ogystal â’i gyrfa broffesiynol, mae Nishat yn credu mewn gwaith gwirfoddol ac ers dau ddegawd a hanner mae hi wedi bod yn gysylltiedig â nifer o fudiadau cymdeithas sifil sy’n gweithio ym maes datblygiad cymdeithasol cymunedau. Mae Nishat yn briod ac mae ganddi dri o blant​.​