Cynnwys y Cwrs
Blwyddyn Un:
Mae'r hall fodiwlau sydd wedi'u marcio * hefyd ar gael i'w hastudio trwy gyfrwng Cymraeg.
Ymarfer Proffesiynol (1): Datblygu Ymarfer Effeithiol (60 credyd) *
Yn ystod y modiwl hwn, cewch eich cyflwyno i ofynion y cymhwyster Statws Ymarferydd Blynyddoedd Cynnar. Cewch gyfleoedd helaeth yn ymarferol i ddatblygu sgiliau mewn perthynas â chreu amgylcheddau maethlon a chynhwysol sy'n darparu gofal ac addysg o ansawdd uchel. Fe'ch anogir hefyd i fyfyrio ar eich datblygiad eich hun yn eich ymarfer.
Y Plentyn sy'n Datblygu 1 (20 credyd) *
Yn ystod y modiwl hwn byddwch yn datblygu eich dealltwriaeth o'r ffactorau sy'n dylanwadu ar dwf a datblygiad mewn plant. Bydd agweddau penodol ar ddatblygiad yn ystod plentyndod yn cael eu hystyried gan gynnwys meysydd fel gwybyddiaeth, cof, iaith a datblygiad emosiynol a chymdeithasol.
Y Plentyn sy'n Datblygu 2 (20 credyd) *
Yn dilyn ymlaen o Y Plentyn sy'n Datblygu 1, bydd y modiwl hwn yn caniatáu i chi archwilio ystod o safbwyntiau damcaniaethol sy'n gysylltiedig â phlant, datblygiad plant a phlentyndod a sut mae'r rhain yn effeithio ar bolisi ac arfer cyfredol. Cewch hefyd cyfleoedd i ddatblygu gwybodaeth mewn perthynas â nodi polisi ac arfer sy'n ymwneud ag amddiffyn a diogelu plant.
Dysgu Cynnar (20 credyd) *
Bydd sesiynau rhyngweithiol yn darparu cyfleoedd i archwilio gwerth a phwysigrwydd chwarae ym mywydau plant, mewn theori ac ymarfer. Byddwch yn astudio sut a pham mae plant yn chwarae, rôl oedolion ac amgylcheddau wrth ddarparu chwarae i blant 0 i 8 oed ac yn ystyried y buddion a'r heriau posibl yn y busnes hwyliog ond difrifol o ddarparu ar gyfer chwarae plant. Byddwch yn archwilio prosesau a safbwyntiau damcaniaethol caffael iaith a datblygiad mathemategol cynnar trwy werthuso ffactorau allweddol sy'n effeithio ar y ddau faes hyn.
Blwyddyn Dau:
Datblygiad Proffesiynol 2: Gweithio gydag eraill (60 credyd) *
Yn ystod y modiwl hwn, byddwch yn datblygu ymhellach y sgiliau sydd eu hangen i gyflawni Statws Ymarferydd Blynyddoedd Cynnar, gan ganolbwyntio ar weithio gyda theuluoedd. Cewch cyfleoedd helaeth yn ymarferol i ddatblygu eich dealltwriaeth o ystod o fframweithiau a ddefnyddir mewn lleoliadau, gan ddatblygu sgiliau wrth greu amgylcheddau cefnogol ar gyfer darparu cyfleoedd chwarae, gofal, addysgol a dysgu. Byddwch hefyd yn cymryd rhan mewn prosesau asesu a chynllunio. Bydd cyfleoedd hefyd i archwilio nodweddion entrepreneuriaeth mewn cyd-destun blynyddoedd cynnar a thrwy hynny ganiatáu i chi ddatblygu galluoedd entrepreneuriaeth.
Addysgeg ac Ymarfer yn y Blynyddoedd Cynnar (20 credyd)
Mae'r modiwl Addysgeg ac Ymarfer yn y Blynyddoedd Cynnar yn caniatáu i chi ddatblygu gwybodaeth a dealltwriaeth o'r safbwyntiau athronyddol a damcaniaethol sy'n sail i addysgeg ac ymarfer. Cewch gyfle i werthuso ffactorau sy'n effeithio ar brofiadau plant o addysgeg ac ymarfer gan gynnwys rôl yr oedolyn, yr amgylchedd ac ethos ynghyd ag archwilio ac adolygu gweithrediad addysgeg yn ymarferol.
Dod yn Ymchwilydd (20 credyd)
Bydd y modiwl hwn yn datblygu eich gallu i ymgysylltu'n feirniadol â ffynonellau academaidd a adolygir gan gymheiriaid. Byddwch yn archwilio materion critigol mewn perthynas ag ymgymryd ag ymchwil gan gynnwys materion moesegol a sicrhau caniatâd neu gydsyniad gwybodus. Bydd ystod o ddulliau methodolegol ac offer ymchwil arloesol yn cael eu gwerthuso i ddarparu profiad wrth weithredu a dadansoddi data.
Arweinyddiaeth a Rheolaeth (20 credyd)
Bydd y modiwl hwn yn caniatáu i chi archwilio ystod o sgiliau rheoli allweddol sy'n gysylltiedig â rheoli newid a rheoli prosiectau. Byddwch yn archwilio amrywiol ddulliau a fydd yn caniatáu i chi ddatrys gwrthdaro yn y gweithle tra hefyd yn gwerthuso dulliau i ysgogi ac ymgysylltu â thimau a rheoli perthnasoedd yn hyderus. Bydd y modiwl hwn yn eich galluogi i dystiolaethu eich galluoedd arwain a bydd yn arwain at gymhwyster arweinyddiaeth a rheolaeth gydnabyddedig ILM.
Blwyddyn Tri
Datblygiad Proffesiynol 3: Arweinyddiaeth a Rheolaeth (60 credyd)
Yn ystod y modiwl hwn, bydd cyfleoedd ymarferol helaeth yn eich galluogi i gyflawni'r gofynion sy'n gysylltiedig â chymhwyster Statws Ymarferydd Blynyddoedd Cynnar. Bydd y modiwl hwn yn canolbwyntio ar arweinyddiaeth a rheolaeth, gan ddarparu cyfleoedd i chi ddatblygu sgiliau wrth arwain a chefnogi gofal ac addysg o ansawdd uchel. Byddwch yn archwilio ystod o bolisïau ac yn ystyried eu heffaith ar ymarfer. Byddwch hefyd yn ystyried egwyddorion gwerthuso gwasanaethau blynyddoedd cynnar yn effeithiol. Bydd y modiwl hwn yn eich arfogi â sgiliau i gefnogi'ch dysgu eich hun a dysgu eraill trwy gymunedau ymarfer.
Ymarfer Cynhwysol yn y Blynyddoedd Cynnar (20 credyd)
Trwy gydol y modiwl hwn byddwch yn archwilio'n feirniadol egwyddorion ac arferion allweddol cynhwysiant yn y Blynyddoedd Cynnar, gan gynnwys rôl yr Ymarferydd Blynyddoedd Cynnar. Byddwch yn gwahaniaethu rhwng ac yn dadansoddi'r materion allweddol sy'n gysylltiedig â phlant ag anghenion dysgu ychwanegol. Byddwch yn archwilio ac yn gwerthuso cynllunio a threfnu ymyriadau a strategaethau ar gyfer cefnogi Anghenion Dysgu Ychwanegol (ADY) a chynhwysiant.
Prosiect Ymchwil Annibynnol (40 credyd) *
Bydd y modiwl hwn yn caniatáu i chi ddatblygu'ch gallu i ymchwilio'n annibynnol mewn maes sydd o ddiddordeb penodol i chi. Yn benodol, byddwch yn gallu dewis, rhesymoli a gweithredu prosiect ysgrifenedig estynedig ac yna cyflwyno'r prosiect yn gydlynol ac yn llawn mewn arddull academaidd. Byddwch yn derbyn arweiniad a chefnogaeth gan eich goruchwyliwr trwy gydol y prosiect.
Dysgu ac Addysgu
Rydym yn defnyddio amrywiaeth o ddulliau addysgu sydd wedi'u cynllunio i ddarparu ar gyfer ystod o anghenion dysgu. Mae hyn yn cynnwys gweithdai, seminarau, darlithoedd, amgylcheddau dysgu rhithwir, teithiau maes ac ymweliadau. Mae pob myfyriwr yn cael profiadau awyr agored o ddysgu trwy dreulio amser mewn ardaloedd coetir gan archwilio'r amgylchedd naturiol a'i botensial. Mae lleoliadau yn y gwaith wedi'u hymgorffori trwy gydol y cwrs. Mae gan bob modiwl 10 credyd oddeutu 100 awr o astudio ynghlwm wrtho. Bydd 24 o'r rhain yn cael eu cyflwyno mewn sesiynau a addysgir fel darlithoedd, seminarau a gweithdai sydd fel arfer wedi'u trefnu i fod dwy awr yr wythnos. Neilltuir oddeutu 26 awr ar gyfer tasgau astudio a pharatoi dan gyfarwyddyd a osodir yn wythnosol fel rhan o'r sesiynau a addysgir ac mae'r 50 awr sy'n weddill yn astudiaeth hunangyfeiriedig lle mae myfyrwyr yn ymgymryd â'r darllen sy'n ofynnol ar gyfer y modiwl ac yn cwblhau eu hasesiad gofynnol.
Neilltuir tiwtor personol i bob myfyriwr pan fyddant yn cychwyn ar y cwrs ac mae'r tiwtor hwn yn eu cefnogi am eu gradd gyfan. Mae cyfarfodydd gyda'r tiwtor personol wedi'u hamserlennu y mae myfyrwyr yn eu mynychu, ond mae tiwtoriaid hefyd yn gweithredu polisi drws agored sy'n caniatáu i fyfyrwyr gael mynediad atynt y tu allan i'r cyfarfodydd a drefnwyd. Mae gan y brifysgol ddarpariaeth cymorth myfyrwyr sydd wedi'i hen sefydlu ar gyfer myfyrwyr sydd ag anghenion dysgu ychwanegol ac mae hefyd yn gallu delio ag unrhyw faterion sy'n codi yn ystod astudiaethau myfyriwr.
Cefnogir y modiwlau trwy ddefnyddio Amgylchedd Dysgu Rhithwir y Brifysgol, Moodle, sydd ar y we ac felly mae'n hygyrch yn unrhyw le trwy'r rhyngrwyd. Mae'r holl ddeunydd sy'n seiliedig ar gyrsiau yn cael ei gadw yma, gan gynnwys cyflwyniadau darlithoedd a seminarau, gwybodaeth asesu a darllen neu adnoddau ychwanegol. Mae tiwtoriaid hefyd yn defnyddio Moodle i e-bostio myfyrwyr gyda gwybodaeth a diweddariadau.
Daw'r staff ar y rhaglen hon o ystod o gefndiroedd gan gynnwys gwaith chwarae, gwaith cymorth ac addysgu. Maent wedi ymrwymo i ddarparu amgylchedd dysgu cefnogol o ansawdd uchel.
Asesu
Mae asesiadau wedi'u cynllunio i wneud y mwyaf o ddysgu a darparu cyfleoedd realistig i arddangos gwybodaeth. Traethodau, creu adnoddau, dadleuon blog, gweithdai, cyflwyniadau, arsylwi a phortffolios ar-lein yw rhai o'r dulliau a ddefnyddir i asesu eich gwybodaeth, sgiliau a'ch dealltwriaeth o gynnwys modiwl. Rhoddir y dyddiadau cyflwyno i fyfyrwyr ar gyfer asesiadau ar ddechrau pob modiwl, yn ogystal â grid trosolwg asesu ar gyfer y flwyddyn academaidd gyfan i'w helpu i gynllunio a rheoli eu hamser yn effeithiol. Mae myfyrwyr yn derbyn adborth unigol ar eu gwaith sy'n nodi cryfderau a meysydd i'w gwella. Tra byddant ar leoliad, bydd myfyrwyr yn derbyn adborth llafar gan eu mentoriaid yn ddyddiol yn ogystal ag adborth ysgrifenedig yn dilyn ymweliad gan eu Tiwtor Prifysgol.
Cyflogadwyedd a Gyrfaoedd
Cynhyrchir sgiliau cyflogadwyedd trwy brofiad mewn lleoliadau yn y gwaith; o fewn yr amgylchedd addysgu a dysgu a thrwy ystod o brosiectau ymgysylltu â'r gymuned. Yn ogystal â'r rhaglen, cewch gyfleoedd i ddatblygu eich gwybodaeth, eich sgiliau a'ch profiad ymhellach. Er enghraifft, rydym yn darparu cyfleoedd ychwanegol i ennill achrediad mewn cymwysterau Ysgol Goedwig a NSPCC o fewn dau fodiwl cwrs.
Mae ein graddedigion yn cyrchu ystod o swyddi a chyfleoedd cyflogaeth gan gynnwys astudio ymhellach mewn addysg trwy'r Dystysgrif Ôl-raddedig mewn Addysg neu'r Rhaglen Athrawon Graddedig. Mae ein graddedigion wedi dilyn gyrfaoedd mewn ystod o feysydd gan gynnwys rheoli meithrinfa, lles addysgol ac fel swyddogion addysg leol ar gyfer awdurdodau addysg leol. Mae graddedigion hefyd wedi dilyn gyrfaoedd mewn gwaith cymorth i deuluoedd a gofal cymdeithasol.
Dilyniant i Hyfforddiant Athrawon TAR:
Rydym yn falch o sicrhau cyfweliad ar gyfer y Cwrs Cynradd TAR ym Met Caerdydd ar gyfer holl raddedigion y rhaglen hon (ar yr amod bod y cwrs ar agor gydag UCAS). Mae angen dosbarthiad gradd Anrhydedd o 2:2 neu'n uwch ar hyn o bryd, a rhaid cwrdd â'r gofynion mynediad statudol ar gyfer hyfforddiant yng Nghymru (gan gynnwys graddau B neu gyfwerth mewn TGAU ar gyfer Saesneg a Mathemateg, gradd C ar gyfer Gwyddoniaeth).
Mae cyfleoedd ar gyfer astudio ôl-raddedig pellach ym Met Caerdydd hefyd ar gael trwy'r rhaglen M.A. Addysg a gynigiwn.
Gofynion Mynediad a Sut mae Gwneud Cais
Dylai fod gan ymgeiswyr 104 pwynt o 2 Lefel A o leiaf (neu gyfwerth). Gall cynigion nodweddiadol gynnwys:
- 104 pwynt o 2 Lefel A o leiaf i gynnwys gradd Safon Uwch C. Bagloriaeth Cymru - Tystysgrif Her Sgiliau Uwch yn cael ei hystyried yn drydydd pwnc
- Diploma Estynedig Cenedlaethol / Diploma Estynedig Technegol Caergrawnt RQF BTEC Lefel 3 gyda gradd gyffredinol o MMM
- Diploma CACHE gyda gradd C drwyddi draw (lleiafswm o 96 pwynt)
- 104 pwynt o Irish Leavers Certificate mewn Highers i gynnwys graddau 2 x H2 (yr isafswm gradd a ystyrir yw H4)
- 104 pwynt o Scottish Advanced Highers i gynnwys gradd D. Ystyrir Scottish Highers hefyd, naill ai ar eu pennau eu hunain neu mewn cyfuniad.
- 102 pwynt o'r Diploma Mynediad i Addysg Uwch
Os ydych chi'n astudio cyfuniadau o'r uchod, neu os nad yw'ch cymhwyster wedi'i restru, cysylltwch â Derbyniadau neu cyfeiriwch at Chwiliad Cwrs UCAS am y gofynion mynediad. Gellir dod o hyd i ragor o wybodaeth am ein gofynion mynediad, gan gynnwys cymwysterau o'r UE trwy glicio yma.
Os ydych chi'n ymgeisydd hŷn a bod gennych gymwysterau neu brofiad amgen yr hoffech i ni eu hystyried, cysylltwch ag aelod o staff.
Mae mynediad i'r rhaglen hon hefyd yn destun gwiriad DBS boddhaol. Mae mwy o fanylion am weithdrefnau cofnodion troseddol ar gael yn www.cardiffmet.ac.uk/dbs.
Ymgeiswyr Rhyngwladol
Bydd angen i fyfyrwyr nad Saesneg yw eu hiaith gyntaf ddarparu tystiolaeth o ruglder i safon IELTS 6.0 neu gyfwerth o leiaf. I gael manylion llawn am sut i wneud cais a chymwysterau Iaith Saesneg ewch i'r tudalennau Rhyngwladol ar y wefan.
Gweithdrefn Ddethol:
Gwneir cynigion yn seiliedig ar gais trwy UCAS gyda sylw penodol yn cael ei roi i'r datganiad personol.
Sut i wneud cais:
Dylid gwneud ceisiadau am y cwrs hwn (amser llawn) ar-lein i UCAS www.ucas.com . I gael rhagor o wybodaeth am geisiadau amser llawn a rhan amser, ewch i'n tudalennau Sut i Wneud Cais yma www.cardiffmet.ac.uk/howtoapply.
Dylid gwneud ceisiadau rhan-amser yn uniongyrchol i'r Brifysgol drwy www.cardiffmet.ac.uk/selfservice.
Dysgu Blaenorol Cydnabyddedig (RPL) a Throsglwyddo Credyd i flwyddyn 2 a 3
Os oes gennych ddiddordeb mewn trosglwyddo credyd o sefydliad arall i astudio ym Met Caerdydd ar gyfer cwrs sy'n derbyn mynediad ar gyfer blwyddyn 2 a / neu 3, gallwch ddod o hyd i wybodaeth bellach am hyn ac ar sut i wneud cais ar y dudalen RPL. Cysylltwch â Derbyniadau oes oes gennych unrhyw ymholiadau ar RPL.
Myfyrwyr hŷn
Ymgeisydd hŷn yw unrhyw un dros 21 oed na aeth i'r brifysgol ar ôl ysgol neu goleg. Mae Met Caerdydd yn croesawu ceisiadau gan ymgeiswyr hŷn a gellir dod o hyd i gyngor a gwybodaeth bellach yma.
Cysylltu â Ni