Rheoli Busnes Byd-eang (Ategol) - Gradd BA (Anrh)

Cynigir y rhaglen fel gradd lawn amser blwyddyn o hyd. Mae'n para am ddau semester gyda myfyrwyr yn astudio tri modiwl ugain credyd yn y naill semester a'r llall gan ennill cyfanswm o 120 credyd lefel 6 dros y flwyddyn academaidd.

Wrth ddyfeisio cynnwys y cwrs mae'r tîm addysgu wedi ceisio sicrhau cydbwysedd priodol rhwng sgiliau academaidd a galwedigaethol er mwyn rhoi corff o wybodaeth i fyfyrwyr sy'n briodol i fyd rhyngwladol busnes ynghyd â'r sgiliau a fydd yn galluogi myfyrwyr i gymhwyso gwybodaeth o'r fath i sefyllfaoedd busnes rhyngwladol realistig.

Yn y semester cyntaf mae'n ofynnol i bob myfyriwr astudio tri modiwl ugain credyd gorfodol. Y rhain yw:

• Rheoli Adnoddau Dynol Byd-eang (HRM)
• Rheoli Cadwyni Cyflenwi Byd-eang
• Economeg, Strategaeth a Rheoli

Ar ddiwedd y semester cyntaf, gall myfyrwyr benderfynu, gydag arweiniad academaidd, a ydynt yn dymuno dilyn y radd BA (Anrh) Rheoli Busnes Byd-eang generig neu ddilyn un o'r tri llwybr y mae'r rhaglen yn eu cynnig. Ar hyn o bryd, y tri llwybr a gynigir yw:

• BA (Anrh) Rheoli Busnes Byd-eang (Rheoli Adnoddau Dynol)
• BA (Anrh) Rheoli Busnes Byd-eang (Logisteg a Rheoli'r Gadwyn Gyflenwi)
• BA (Anrh) Rheoli Busnes Byd-eang (Rheoli Strategol)

Mae pob llwybr yn cynnwys dau fodiwl ugain credyd llwybr penodol gorfodol, fel a ganlyn:

BA (Anrh) Rheoli Busnes Byd-eang (Rheoli Adnoddau Dynol)

• Rheoli Talent Byd-eang
• Adnoddau Pobl yn y Cyd-destun Byd-eang

BA (Anrh) Rheoli Busnes Byd-eang (Logisteg a Rheoli'r Gadwyn Gyflenwi)

• Logisteg Ryngwladol
• Rheoli Gweithrediadau

BA (Anrh) Rheoli Busnes Byd-eang (Rheoli Strategol)

• Strategaeth Busnes Cyfoes
• Amgylchedd Busnes Byd-eang

Yn ogystal, rhaid i fyfyrwyr ddewis un modiwl dewisol ugain credyd o'r rhestr a ddarperir gan y rhaglen

Ar gyfer myfyrwyr ar y radd BA (Anrh) Rheoli Busnes Byd-eang generig, rhaid dewis unrhyw dri modiwl dewisol ugain credyd o'r opsiynau canlynol:

• Marchnadoedd Ariannol Byd-eang
• Strategaeth Busnes Cyfoes
• Rheoli Arloesedd a Chreadigrwydd mewn Marchnadoedd Byd-eang
• Rheoli Marchnata a'r Brand Byd-eang
• Effaith Amrywiaeth Ddiwylliannol ar Benderfyniadau Rheoli
• Logisteg Ryngwladol
• Rheoli Talent Byd-eang
• Prosiect Menter

Sylwer bod llwybrau a modiwlau dewisol yn dibynnu ar alw myfyrwyr ac er y gwneir pob ymdrech i fodloni eich dymuniadau efallai na fydd yn bosibl bob amser.

Amcan strwythur y cwrs a'r strategaethau addysgu arfaethedig yw annog dull dysgu sy'n canolbwyntio ar y myfyriwr. Bydd strategaethau o'r fath yn cynnwys; astudiaethau achos; prosiectau; ymarferion ymarferol a ategir gan y defnydd o ddeunyddiau cymorth priodol; fideos; ac ati Mae ymgysylltu'n weithredol â'r deunydd pwnc yn gwella dysgu ac mae llawer o'r strategaethau dysgu a ddefnyddir yn ceisio hyrwyddo hyn.

Bydd y deunydd cwricwlaidd yn cael ei gyflwyno drwy gyfuniad o ddarlithoedd, tiwtorialau, seminarau a gweithdai.

Darlithoedd Mae darlithoedd yn rhan bwysig o'r strategaeth addysgu ar gyfer y rhaglen. Mae darlithoedd yn ffordd effeithiol o gyflwyno deunydd craidd a sefydlu fframwaith ar gyfer modiwl y gellir gosod deunydd arall yn ei erbyn.

Tiwtorialau Pwnc Modiwlaidd Cyfarfodydd myfyriwr neu grŵp o fyfyrwyr gyda darlithydd neu ddarlithwyr yw tiwtorialau ac fe'u defnyddir mewn dwy ffordd yn y rhaglen:

• ehangu ar ddeunydd a drafodir mewn darlithoedd drwy ddull datrys problemau a gaiff ei lywio gan ymholi
• gwaith adfer i oresgyn unrhyw ddiffygion yng ngwybodaeth gefndir myfyriwr.

Seminarau Mewn seminarau mae myfyriwr neu fyfyrwyr yn cyflwyno gwaith y maent wedi'i baratoi ymlaen llaw i gyfoedion a darlithydd. Defnyddir y strategaeth hon i ymestyn cysyniadau damcaniaethol neu ymarferol penodol yn ogystal â chyflwyno ymarferion datrys problemau. Defnyddir seminarau yn y rhan fwyaf o fodiwlau ac maent yn rhoi profiad gwerthfawr i fyfyrwyr o sgiliau cyflwyno, blogiau neu bodlediadau, yn ogystal â rhoi dull i staff asesu dysgu sy'n canolbwyntio ar y myfyriwr.

Gweithdai Ymarferol Defnyddir gweithdai ymarferol mewn rhai modiwlau drwy gydol y rhaglen. Yn y dosbarthiadau hyn gall myfyrwyr ymarfer a mireinio eu sgiliau mewn amgylchedd cefnogol lle gallant gael adborth gan aelod o staff academaidd. Mae gweithdai ymarferol yn ddull gwerthfawr o bontio rhwng theori ac ymarfer.

Astudiaethau Achos

Strategaethau addysgu a dysgu yw astudiaethau achos a ddefnyddir mewn amrywiaeth o fodiwlau. Maent yn offeryn asesu defnyddiol hefyd. Cyflwynir problemau cymhleth go iawn neu ffug i fyfyrwyr neu gofynnir iddynt ddatblygu rhai eu hunain ac yna mae gofyn iddynt eu dadansoddi'n fanwl ac yna cyfosod/cyflwyno eu datrysiad eu hunain yn ysgrifenedig neu ar lafar.

Yn ogystal â'r sesiynau ar yr amserlen, disgwylir i fyfyrwyr gyflawni astudiaeth annibynnol sy'n cyfateb i tua 104 awr ar gyfer pob ugain modiwl credyd

Cymorth i fyfyrwyr a'u dysgu

Tiwtoriaid Personol

Mae'r holl fyfyrwyr sy'n astudio yn Ysgol Reoli Caerdydd yn elwa ar y tîm o diwtoriaid ymroddedig sy'n darparu pwynt cyswllt personol a rheolaidd i fyfyrwyr. Maent yn rhoi myfyrwyr ar ben ffordd gyda materion megis cyllid, lles, datblygu gyrfa yn ogystal â helpu gyda chynllunio patrymau astudio effeithiol, paratoi ar gyfer arholiadau ac amrywiaeth o faterion pwysig eraill lle bo angen.

Y Swyddfa Ryngwladol Mae cymorth ychwanegol ar gael i bob Myfyriwr Rhyngwladol, a ddarperir gan y Swyddfa Ryngwladol.

Cymorth Academaidd

Yn ogystal â'r sesiynau darlithio a seminar mae gan bob modiwl slot wythnosol ar yr amserlen lle mae arweinydd y modiwl ar gael i roi arweiniad a chymorth pellach ar ei fodiwl. Mae yna slot wythnosol ar yr amserlen hefyd lle mae Cyfarwyddwr y Rhaglen a'r Tiwtor Blwyddyn yn cyfarfod â myfyrwyr yn rheolaidd i fentora a hwyluso datblygiad proffesiynol personol pellach.

Mae'r rhaglen yn cynnig cymorth cyffredinol pellach i'r myfyrwyr drwy'r canlynol:

• Rhaglen sefydlu
• Llawlyfr myfyrwyr, llawlyfr rhaglen a llawlyfrau modiwlau unigol
• Cynnwys a deunyddiau modiwlau drwy Moodle
• Llyfrgell a phecynnau sgiliau astudio
• Llyfrgell ac adnoddau dysgu
• Cyfleusterau cyfrifiadura arbenigol gan gynnwys labordai rhyngweithiol ac aml-gyfrwng
• Cyfleuster TG mynediad agored 24 awr ar gampysau Cyncoed a Llandaf
• Mynediad diderfyn i'r we fyd-eang
• Mynediad at wasanaethau myfyrwyr gan gynnwys y rhai a gynigir gan y gwasanaethau gyrfaoedd, lles, anabledd, cwnsela, caplaniaeth a'r ganolfan feddygol

Mae asesiadau'n ymwneud yn uniongyrchol â deilliannau dysgu ac mae pob asesiad yn cwmpasu casgliad o ddeilliannau o'r fath fel arfer. Wrth gynllunio a phenderfynu ar fformat asesu ar gyfer modiwl, ystyriwyd y ffactorau canlynol:

• Deilliannau dysgu'r modiwl a'u lefel, gyda phwyslais arbennig ar allu'r myfyriwr i ddadansoddi, cyfosod, gwerthuso a chyfleu gwybodaeth sy'n deillio o:

• Cynnwys y Modiwl
• Gwybodaeth a ddysgwyd o feysydd/cymwysterau eraill
• Profiad
• Gweithredu strategaethau systematig i chwilio am wybodaeth
• Annog myfyrwyr i gymhwyso eu sgiliau i broblemau diwydiant/busnes/rheoli penodol
• Ymdrin â phroblemau mewn ffordd systematig a defnyddio dulliau profi a allai ddatrys y problemau hynny
• Meini prawf perfformiad asesu, fel y'u cyfathrebir i'r myfyriwr
• Dilysrwydd a dibynadwyedd y dulliau asesu, sy'n cael eu monitro gan arweinwyr modiwlau, grwpiau maes a thimau rhaglenni
• Cyfyngiadau amser (i fyfyrwyr a staff) a'r angen i sicrhau cysondeb
• Y defnydd o strategaethau amrywiol y gall myfyriwr eu defnyddio i ddangos yr hyn y mae'n ei wybod, ei ddeall neu'n gallu ei wneud
• Yr angen am asesiad i ganiatáu ar gyfer adolygu a myfyrio gan y myfyriwr

Gall yr asesiadau eu hunain fod mewn sawl ffurf wahanol er mai un o nodweddion allweddol y rhaglen yw'r ddibyniaeth ar waith cwrs yn hytrach nag asesiadau sy'n seiliedig ar arholiadau. Mae enghreifftiau o asesiadau'n cynnwys cyflwyniadau unigol neu grŵp, cyflwyniadau poster, adroddiadau, traethodau, tasgau ymarferol, cwestiynau amlddewis a phrofion dosbarth ag amser cyfyngedig.

Mae graddedigion llwyddiannus wedi cael swyddi ar lefel goruchwylio a rheoli nid yn unig yn y sectorau busnes a masnach traddodiadol ond hefyd mewn mentrau bach a chanolig, y sector cyhoeddus a'r sectorau gwirfoddol.

Mae eraill wedi dewis parhau â'u hastudiaethau ac wedi symud ymlaen i raglenni Lefel Meistr fel MSc Rheoli Busnes Rhyngwladol, MSc Rheoli Ariannol ac MBA yn Ysgol Reoli Caerdydd.

Dylai fod gan ymgeiswyr naill ai Ddiploma Cenedlaethol Uwch (neu gymhwyster cyfatebol) mewn Busnes a Rheoli, gradd Sylfaen neu gymhwyster (NARIC) cyfatebol sydd werth 240 o gredydau.

Ymgeiswyr Rhyngwladol: Cyn gwneud cais, dylai myfyrwyr rhyngwladol (y rhai y tu allan i'r UE), gysylltu â'r Swyddfa Ryngwladol ym Met Caerdydd i drafod y gweithdrefnau angenrheidiol mewn perthynas ag astudio gyda ni. Am ragor o wybodaeth ewch i tudalennau Rhyngwladol ar y wefan.

Ymgeiswyr Rhyngwladol
Bydd angen i fyfyrwyr nad Saesneg yw eu hiaith gyntaf ddarparu tystiolaeth o ruglder i safon IELTS 6.0 neu gyfwerth o leiaf. I gael manylion llawn am sut i wneud cais a chymwysterau Saesneg Iaith ewch i'r tudalennau Rhyngwladol ar y wefan.

Gweithdrefn Ddethol: Y prif feini prawf ar gyfer dethol ymgeiswyr yw bod yn rhaid iddynt ddangos y gallant lwyddo ar raglen radd.

Rhaid i fyfyrwyr sy'n dymuno ymuno â'r cwrs wneud cais ar sail Cydnabod Dysgu Blaenorol (RPL) neu Gydnabod Dysgu Blaenorol drwy Brofiad (RPEL) i'w derbyn gyda Chredyd. Rhaid i geisiadau o'r fath gydymffurfio â Rheoliadau Prifysgol Metropolitan Caerdydd ar gyfer statws uwch a rhaid i ymgeiswyr gyflwyno portffolio o dystiolaeth. Caiff hyn ei asesu gan aelodau o dîm y cwrs yn y lle cyntaf ac anfonir adroddiad i'w gadarnhau at Bwyllgor Dysgu ac Addysgu'r Ysgol. Bydd y manylion yn y portffolio hwn yn dibynnu ar natur y credyd sy'n cael ei hawlio.

Sut i Wneud Cais:
Dylid gwneud ceisiadau ar gyfer y cwrs hwn i'r Brifysgol yn uniongyrchol. I gael rhagor o wybodaeth ewch i'n tudalennau Sut i Wneud Cais Rhyngwladol.

Ar gyfer ymholiadau cyffredinol cysylltwch â'r Tîm Derbyniadau ar 029 2041 6044 neu e-bostiwch holiderbyniadau@metcaerdydd.ac.uk.

Ar gyfer ymholiadau am y cwrs yn benodol, cysylltwch ag Dr Kyriaki Flouri:

• E-bost: kflouri@cardiffmet.ac.uk