Rhaglen Atgyfnerthu ar gyfer Gweithwyr Cymdeithasol sydd Newydd Gymhwyso

Mae’r rhaglen yn adlewyrchu ymchwil, deddfwriaeth a pholisi cyfredol ac yn ymgorffori’r cyd-destun Cymreig sy’n cynnwys yr iaith, diwylliant, daearyddiaeth a deddfwriaeth yng Nghymru. Mae’r Cod Ymarfer Proffesiynol ar gyfer Gweithwyr Gofal Cymdeithasol (2017) a’r Safonau Galwedigaethol Cenedlaethol perthnasol (2012) yn sail i’r dysgu. Amlygir cyd-destun rhyngbroffesiynol ymarfer Gwaith Cymdeithasol. Mae safbwyntiau unigolion sydd angen gofal a chymorth a’u gofalwyr yn gyffredin drwy gydol y broses o reoli, cyflwyno a datblygu’r modiwl.

Mae’r Rhaglen Atgyfnerthu yn canolbwyntio ar dri maes allweddol, gyda phwyslais arbennig ar y trydydd maes:

• Cymhwyso dadansoddiad wrth asesu i lywio ymyriadau.
• Gweithio ar y cyd ag unigolion sydd angen gofal a chymorth a’u gofalwyr a gweithwyr proffesiynol eraill.
• Ymyrraeth a chymhwyso barn broffesiynol mewn sefyllfaoedd cynyddol gymhleth.

Mae modiwl y rhaglen werth 30 credyd ar Lefel 6.

Cyflwynir y Rhaglen Atgyfnerthu mewn cydweithrediad â Phrifysgol De Cymru a Phrifysgol Fetropolitan Caerdydd a 10 Awdurdod Lleol i gynnwys Rhondda Cynon Taf, Merthyr Tudful, Blaenau Gwent, Caerffili, Caerdydd, Bro Morgannwg, Pen-y-bont ar Ogwr, Mynwy, Casnewydd a Thorfaen. Mae hyn yn sicrhau bod y modiwl yn berthnasol i anghenion a gofynion y gweithlu. Y Sefydliad Addysg Uwch (SAU) fydd y corff dyfarnu. Mae’r Rhaglen yn cael ei dilysu gan y ddau SAU a’i chymeradwyo gan Ofal Cymdeithasol Cymru o dan y Cymeradwyo ac Arolygu ar gyfer Cyrsiau Gwaith Cymdeithasol Ôl-gymhwyso (Cymru) 2019.

Fel ymgeisydd Atgyfnerthu, bydd Aseswr Ymarfer Atgyfnerthu yn cael ei neilltuo i chi o fewn eich Awdurdod Lleol a fydd yn eich asesu a’ch cefnogi trwy gydol eich taith ddysgu.

Cyflwyniad

Nod y diwrnod cyflwyno yw eich cofrestru fel ymgeiswyr ar y rhaglen; rhoi amlinelliad i chi o’r diwrnodau a addysgir, y canlyniadau dysgu a’r Safonau Galwedigaethol Cenedlaethol. Rhoddir esboniad o’r broses asesu o safbwynt academaidd ac ymarfer ynghyd â throsolwg o’u portffolio o dystiolaeth.

Diwrnod 1: Asesu a Dadansoddi o fewn Ymarfer

Nod y diwrnod cyntaf fydd asesu risg a rheoli risg a gweithio gyda chymhlethdod. Byddwn yn archwilio sut rydym yn gwneud synnwyr o’r wybodaeth a gyflwynir i ni yn ystod yr asesiad gan ystyried sut / beth / pam rydym yn blaenoriaethu gwybodaeth gan wneud cysylltiadau rhwng theori ac ymarfer. Bydd ystyriaeth o chwilfrydedd, dadansoddiad proffesiynol a sut y gall y rhain lywio arfer da mewn perthynas ag asesiadau a gwneud penderfyniadau.

Canlyniadau dysgu diwrnod 1:

• 1.1 Deall sut mae fframweithiau deddfwriaethol, safbwyntiau damcaniaethol, safonau, a chanllawiau yn cael eu defnyddio i lywio ymarfer asesu.
• 1.3 Gallu cofnodi gwybodaeth asesu er mwyn llywio’r broses o wneud penderfyniadau.
• 1.4 Gallu llunio barn broffesiynol yn seiliedig ar wybodaeth asesu.
• 3.2 Gallu rheoli eich rôl fel gweithiwr cymdeithasol mewn sefyllfaoedd sy’n gynyddol gymhleth.
• 3.6 Gallu cyfrannu at brosesau cyfreithiol o fewn cylch gwaith cymdeithasol proffesiynol.
• 3.7 Gallu ymarfer atebolrwydd proffesiynol mewn sefyllfaoedd fwyfwy cymhleth.

Diwrnod 2: Gwaith Cymdeithasol mewn Cyd-destun Cymdeithasol. Fframweithiau Cyfreithiol a Pholisi Cymdeithasol

Nod yr ail ddiwrnod fydd rhoi trosolwg i chi o bolisïau rhyngwladol sy’n ymwneud â Gwaith Cymdeithasol a nodi sut mae’r ffocws rhyngwladol yn dylanwadu ar bolisi ac ymarfer yng Nghymru. Bydd yn archwilio dulliau o arfer gwaith cymdeithasol a fydd yn hyrwyddo cydweithio er mwyn gwella llesiant unigolion sy’n defnyddio gwasanaethau a’u gofalwyr. Bydd hefyd yn ystyried sut y gall arferion gwaith cymdeithasol yng Nghymru gael eu dylanwadu gan faterion a safbwyntiau byd-eang.

Canlyniadau dysgu diwrnod 2:

• 1.2 Gallu defnyddio dull sy’n canolbwyntio ar ganlyniadau sy’n canolbwyntio ar y dinesydd i gynnal ystod o asesiadau i hyrwyddo a chefnogi lles.
• 2.1 Gallu cyfathrebu’n effeithiol â phobl sydd angen gofal a chymorth a’u gofalwyr.
• 2.2 Gallu gweithio mewn partneriaeth ag unigolion a gweithwyr proffesiynol eraill.
• 3.1 Deall y berthynas rhwng polisi cymdeithasol, fframweithiau deddfwriaethol a chanllawiau gyda darpariaeth gwasanaethau cymdeithasol yng Nghymru.

Diwrnod 3: Myfyrdod Beirniadol ar Waith

Nod y sesiwn olaf hon byddwn yn ystyried y gwahanol lefelau o fyfyrio y gellir eu defnyddio yn ymarferol. Byddwn yn ystyried sut mae myfyrio beirniadol yn eich cynorthwyo i reoli cymhlethdod ac yn eich galluogi i werthuso’n feirniadol eich dadansoddiad a’ch penderfyniadau eich hun o fewn asesiadau Gwaith Cymdeithasol. Bydd hefyd atgoffa am ofynion asesu.

Canlyniadau dysgu diwrnod 3:

• 1.5 Gallu defnyddio myfyrio beirniadol i werthuso dadansoddiad eich hun mewn asesiadau gwaith cymdeithasol.
• 2.3 Myfyrio’n feirniadol ar waith cydweithredol eich hun.

Mae dwy ran i asesu’r modiwl hwn, sef asesiad crynodol academaidd (3,000 o eiriau) a phortffolio o dystiolaeth. Mae’r portffolio’n cynnwys un arsylw uniongyrchol gydag unigolion sy’n defnyddio gwasanaethau a’u gofalwyr (ac adborth o’r gwaith uniongyrchol hwn), un ymarfer grŵp cyfoedion a, phedair set o funudau goruchwylio. Rhaid llwyddo yn y ddwy elfen o’r asesu er mwyn dyfarnu’r modiwl 30 credyd.

Y meini prawf ar gyfer mynediad i’r rhaglen yw bod yr ymgeisydd:

• Gweithiwr cymdeithasol cymwysedig ac ar Gofrestr Gofal Cymdeithasol Cymru, neu Gofal Cymdeithasol Lloegr, neu Gyngor Gwasanaethau Cymdeithasol yr Alban neu Gyngor Gofal Cymdeithasol Gogledd Iwerddon, (ac yna bydd yn ofynnol iddo aros ar y Gofrestr er mwyn cael dyfarniad).
• Ar waith ar hyn o bryd, (a / neu yn gallu cael mynediad at gyfleoedd dysgu ymarfer i ddiwallu anghenion dysgu ac asesu’r modiwlau astudio a fwriedir). Yn y rhan fwyaf o achosion, mae cymorth gan gyflogwyr a / neu reolwyr llinell yn tystio i hyn.
• Bydd ymgeiswyr fel arfer yn cael eu henwebu a’u cefnogi gan yr asiantaethau sy’n eu cyflogi, y mae’n rhaid iddynt roi cadarnhad ysgrifenedig y bydd ymgeiswyr yn cael eu rhyddhau i fynychu’r cwrs, ac y byddant yn cael cefnogaeth ddigonol ar gyfer y modiwl(au) a ymgymerir, e.e., aseswr ar gyfer unrhyw arsylwadau uniongyrchol.
• Rhaid cyflwyno pob cais ar ffurflenni cais priodol y Brifysgol ac wedi dod drwy’r Awdurdod Lleol perthnasol.
• Fel arfer bydd ymgeiswyr wedi cwblhau gofynion Blwyddyn Gyntaf o Ymarfer ar adeg gwneud cais, sy’n cynnwys yr hyfforddiant gorfodol a ddarperir gan Awdurdodau Lleol.
• Dylai pob cais gan ymgeiswyr annibynnol ddod drwy’r Asiantaeth Gefnogi, sy’n tueddu i fod yn Adran Hyfforddiant eich Awdurdod Lleol agosaf. Cysylltwch ag Adran Hyfforddiant eich Awdurdod Lleol agosaf i gael rhagor o wybodaeth am sut i wneud cais am y Rhaglen Atgyfnerthu ym Met Caerdydd.

Os hoffech wneud cais am y Rhaglen Atgyfnerthu ym Met Caerdydd, yna i ddechrau cysylltwch â Thîm / Rheolwr Datblygu Gweithlu eich Asiantaeth (neu Adran Hyfforddiant eich Awdurdod Lleol agosaf os nad ydych yn gweithio i gyngor lleol).

I gael rhagor o wybodaeth am y cwrs ym Met Caerdydd, cysylltwch â:

• Kate Andrews – KAndrews@cardiffmet.ac.uk (Gweinyddwr y Dyfarniad)
• Jude Badmington-Fowler – JHBadmington-Fowler@cardiffmet.ac.uk (Cyfarwyddwr Rhaglen Gwaith Cymdeithasol Ôl-gymhwyso a Chydlynydd Modiwl)

Edrychwn ymlaen at glywed gennych os oes gennych unrhyw ymholiadau ac i helpu i’ch cefnogi yn eich datblygiad proffesiynol.